Ginrelieve ang commander sang Coast Guard BREDCO Sub-station kasunod sang pagtabok sang tatlo ka mga seaman sa probinsya sang Iloilo agud makapauli sa Capiz sa pihak sang general community quarantine nga ginapatuman bangud sa coronavirus disease.
Sa interview sang Bombo Radyo kay Commander Jansen Benjamin, pinuno sang Coast Guard Station Negros Occidental, ginahanda na nila ang investigation report may kaangtanan sa insidente.
Sa inisyal nga pag-usisa sa Coast Guard personnel sa BREDCO Port, ginpahayag sini nga ginbase niya sa Section 2.3 sang Executive Order No. 22 Series of 2020 nga gin-issue ni Mayor Evelio Leonardia kun sa diin pahanugutan ang mga out-of-towners nga makapauli sa ila balay kun wala sang sintomas sang COVID-19.
Suno kay Benjamin, halin sa Clark International Airport ang mga seaman, naglabay sa Cebu, nagtabok sa Sibulan, Negros Oriental kag nagpadulong sa Bacolod.
Ang tatlo ang nagsakay sa roro vessel nga ginakargahan sang mga goods patabok sa Iloilo.
Bangud sila ang ginakabig nga person under monitoring suno kay Benjamin, sarang kuntani sila mahold sang Coast Guard Dumangas agud mapanilagan bangud nakahanda man ang mga ini nga magpa-quarantine.
May yara man sila sang sulat nagikan sa employer nga mapakonsulta sa Provincial Health Office kun mag-abot sa Capiz.
Kadungan sini, liwat nga naghingyo sang pasaylo si Benjamin sa alkalde sang Iloilo City kag gobernador sang Iloilo.
