Ginlatag sang Commission on Human Rights – Child Rights Center ang apat ka nagapanguna nga rasun kun ngaa sila ang nagapamatok sa pagpanubo sang minimum age of criminal responsibility.
Sa interview sang Bombo Radyo Bacolod kay Ma. Victoria Diaz, officer in charge sang CHR Child Rights Center, nagapati sila nga indi sabat ang pagpanubo sang edad sang criminal liability sa pagtapna sa nagasaka nga kaso sang bayolente nga mga hinimuan sang kabataan.
Nahibaluan nga sa idalom sang Republic Act 9344 ukon Juvenile Justice and Welfare Act of 2006 ang pinakamanubo nga edad nga sarang mapaidalom sa regular trial sa kaso kriminal ang tubtob 15 anyos kun mapamatud-an nga may discernment.
Ini ang ginapanawagan nga panaugon sa napulo ka tuig ukon 12 anyos.
Suno diri, indi man maka-apekto sa rate sang krimen ang pagpanubo sang minimum age of criminal responsibility bangod sa statistics, masobra 85 percent sang children in conflict with the law (CICL) sa Pilipinas ang 15 anyos pasaka.
Panindugan ni Diaz nga wala sang problema sa edad, kag sala ang paghangop nga indi na manabat ang minors nga makasala.
Pahanumdom niya nga ang mga ginatawag children in conflict with the law (CICL) ang ikustodiya sa Bahay Pag-asa, kag subject sa psychological interventions kag rehabilitation efforts.
Indi man sang mga ini makaupod ang ila ginikanan, kag wala man sang kahilwayan sa paghulag tubtob nga pahanugutan na sang korte, apang sila ang indi lang mapriso kaupod sang mga adult nga nakakumiter sang krimen.
Sila ang may atubangon man nga civil liabilities, apang bangod wala pa sa husto nga edad, ang multa ang pagabayaran sang ila ginikanan.
Kag ang ikaapat amo ang responsibilidad sang ginikanan, eskwelahan kag media sa pagbuligay agud matudluan ang mga kabataan sang husto kag sala.
