Magapatigayon man sang imbestigasyon ang Committee on Human Rights sang Negros Occidental Provincial Council tuhoy sa Toboso encounter.
Sa interview sang Bombo Radyo Bacolod kay Negros Occidental 5th District Sangguniang Bayan member Hadji Trojillo, chairperson sa Committee on Human Rights, suportahan nila ang fact-finding investigation aud mahatagan sang kasanagan ang pila ka mga concerns kalakip na ang pamilya sang mga napatay.
Ini nahanungod sa concerns sang pila ka mga grupo sa pagkapatay sang 19 kalakip na sang student leader, manunudlo kag local kag foreign journalist, sa nasambit nga engkwentro.
Ang insidente ang gintawag man sang pila ka grupo nga strafing kag indi encounter.
Apang madumduman nga may mga pumuluyo sa Sitio Plarinding, Brgy Salamanca nga nagpost sa social media sang video kun sa diin mabatian ang pagbayluhanay sang mga lupok sang duha ka kampo.
Suno kay Trojillo, pinaagi sa imbestigasyon, mahatagan sang kasanagan kun paano gid natabo ang engkwentro kasubong man mapaathag kun ngaa yara sa encounter site kag kaupod sang rebelde nga grupo ang mga estudyante, student leader, manunudlo, human rights advocates kag local kag foreign journalists.
Isa sa ginapanindugan sang iban nga nagapatigayon lamang ang mga ini sang community immersion, gani suno kay Trojillo, importante nga mahibaluan mismo gikan sa komunidad kun matuod-tuod nga nagapatigayon gid man sang study ang mga biktima sa pagpangabuhi sang lokal nga pumuluyo.
Ginklaro man sini nga isa man sa luyag na nila nga matapos ang insurhensya nga ginahimo sang New People’s Army.
Ginhalimbawa sini ang isa ka pamilya sa Sipalay City nga ginsulod sa balay kag ginpamatay sang mga rebelde.
