Nagapabilin nga independent si Bacolod City Lone District Congressman Alfredo ‘Albee’ Benitez sa kongreso kag nagpanindugan nga indi magsuporta kay House Speaker Martin Romualdez.
Sa interview sang Bombo Radyo Bacolod kay Bacolod City Councilor Atty Caesar Distrito, spokesperson ni Congressman Benitez, humalin pa sadto wala naghambal si Benitez nga luyag sini mangin House Speaker apang madamo sang kongresista nga nagaduso sa iya sa pwesto.
Suno diri, gintindugan ni Benitez nga mangin independent bangod ginakwestyon sini ang issue sa ghost flood control project, budget insertions, kag non transparency sa budget process nga nagalabay tanan sa House Speaker.
Suno pa kay Distrito, klaro nga wala nagasuporta si Benitez kay Romualdez kag wala man may ginahimo ang kongresista nga tikang agud mangin House Speaker bangod sa kongreso, kun sin-o man ang botohon sang majority, siya ang magadaog.
Apisar nga madamo sang kongresista nga nagasuporta kay Benitez, suno kay Distrito indi man siya maggiyo kun kulang ang numero nga nagasuporta sa iya.
Samtang, ginarespeto naman ni Benitez ang desisyon sang mga kongresista sa Negros Island Region bangod ila lang man ginalantaw ang maayo para sa ila distrito.
Pahayag sini, indi luyag sang kongresista sang distrito sang Bacolod City nga ipakita nga nagaprotekta ini sa House Speaker kag para kay Distrito insakto ang panindugan ni Benitez.
