Nasunog ang isa ka container van nga naga-unod sang nagkalain-lain nga produkto sa Hernaez St., Brgy Taculing ciudad sang Bacolod kahapon, Enero 5.
Sa interview sang Bombo Radyo kay Richie Catalan, isa sa mga nakawitness sa sunog, nakita sini ang isa ka truck nga naga-aso kag gilayon nga ginbuligan responde sang mga pumuluyo antes paman nag-abot ang personnel sang Bureau of Fire Protection.
Suno kay Catalan, naglab-ot sa masobra isa ka oras antes pa man nila napatay ang kalayo.
Suno diri, ang truck ang maga-deliver sang mga produkto kag natukiban nga naga-aso rason nga nagdulog ang driver agud nga lantawon, kag sang gin-abrihan sini ang likod nga bahin sang truck ini ang nagakalayo na.
Ginapatihan nga nagikan sa wiring ang nagresulta sang sunog.
Dugang pa, ang truck ang naga-unod sang madamo nga mga kagamitan kaangay sang sapatos, bag kag iban pa ang nasunog.
Suno sa Bacolod City Fire Station, nagdangat sa masobra P10,000 ang balor sang nahalitan sang sunog.
Samtang wala sang mga nasamaran sa nasambit nga sunog.
