Nagpatigayon sang coordination meeting para sa Negros Island Region set-up sa ciudad sang Bacolod subong nga adlaw.
Ini ang gintambungan sang mga alkalde kag pila ka opisyal sa Negros Occidental, Negros Oriental kag Siquijor kasubong man sang mga Regional Offices directors.
Ang mga ini ang ginhatag assignments ni Bacolod City Mayor Alfredo “Albee” Benitez nga amo ang chairperson sa Regional Development Council.
Sa pahayag ni Dumaguete City Mayor Felipe Antonio Remollo, ginapakamaayo sini nga subong pa lamang ginapreparahan na kun paano matunga sa mga probinsya ang mga ahensya sang gobyerno.
Pasalig sang alkalde nga wala ini sang nakita nga seryoso nga pagpamalabag sa Negros Island Region Act sa bahin sang Negros Oriental.
Nagapati si Remollo nga ang Negros Island Region ang makapaayo sa turismo sang Negros Occidental, Negros Oriental kag Siquijor.
Apang isa sa concern amo ang travel time padulong sa mga regional government offices, gani dapat nga makatukod sang infrastructure projects kaangay sang highland freeway, kaangay sa banwa sang Bayawan tabok sa Cadiz City.
Kun mahapos nga maaccess sang mga banwa kag ciudad ang Central Highway, ginalantaw ni Remollo nga dako ang iganubo sang travel time sa pagtabok-tabok sa duha ka probinsya.
Isa man sa dapat matun-an ang pagpasanyog sa online services sang mga ahensya agud mas mahapos maaccess kag ang iban nga transaksyon ang mapatigayon na lamang online.
Sa pihak nga bahin, apisar nga Negros Island Region ang pangalan, pahanumdom sini nga ang Siquijor nga kun kaisa ginatawag man nga Isla, ang upod na diri kag indi na kinahanglan bag-uhon.
