Ginhugtan sang Police Regional Office Bangsamoro Autonomous Region ang seguridad sa Cotabato City subong nga BARMM Parliamentary Election kasunod sang mga narecord nga insidente.
Nagdugang sang mga police personnel sa mga polling centers kag iban pa nga strategic areas, samtang nagabantay man ang mga response team para sa gilayon nga pagresponder sang anuman nga security concern.
Kadungan sini, ginapatigayon na ang imbestigasyon kag pursuit operations agud matumod ang mga sa likod sang mga insidente.
Nagapakig-angot ang PRO BAR sa Armed Forces of the Philippines kag iban pa nga security partners para mapabilin ang peace and order samtang ginapatigayon ang labing-una nga BARMM Elections.
Liwat nga nanawagan ang kapulisan sa publiko nga magpabilin nga kalmado kag magpanilag, magkooperar sa mga otoridad, kag gilayon nga ireport ang anuman nga makaduluda nga hulag ukon ano man nga impormasyon angot sa seguridad.
Ginseguro sang kapulisan nga mapabilin nga nakatutok ang ila nga mga personnel agud maseguro ang kaluwasan sang mga botante, election personnel kag publiko, kag maproteksyonan ang kinamatarong sang kada pumuluyo nga makaboto.
Samtang nagpagwa man sang panawagan si Vice President Sara Duterte para sa hilway, transparent, kag maragtason nga una nga eleksyon sa BARMM.
Ginpanugyan sini sa mga botante nga magboto sang responsable kag magpili sang mga lider nga maga-alagad para sa kalinong kag kauswagan sang Bangsamoro.
Nadakpan sang Commission on Elections (COMELEC) ang pila ka pre-shaded nga balota sa Maluso, Basilan kadungan sa pag-umpisa sang labing-una nga BARMM Parliamentary Elections.
Suno sa COMELEC, natumod na sini ang mahimo responsable sa insidente kag ginseguro nga mapapasabat ang sin-o man ang mapamatud-an nga may kaangtanan.
Bangod sini, ginmando sang komisyon ang liwat nga pag-imprenta sang mga balota kag pagpadala sini sa Basilan subong nga adlaw.
Samtang, ginpaidalom na sa COMELEC Control ang Maluso matapos matukiban nga nakompromiso ang mga balota sa 36 gikan sa kabug-usan nga 68 ka voting precincts sa lugar.
Samtang, may nagluntad naman nga tension sa Sultan Mandayan sa Matanog, Maguindanao del Norte samtang nagapadayun ang pagboto sa mga polling precinct.
Napilitan nga magpalupok sang warning shot ang isa ka pulis matapos mabudlayan nga mapunggan ang mga nagadinis-uganay nga botante.
Padayun naman nga ginamonitor ang sitwasyon agud mapabilin ang kalinong kag kahilwayan sa lugar.
