Ginpasalig sang konsehal nga suspetsado sa pag-ambush sa convoy sang bise alkalde sang Moises Padilla, Negros Occidental nga magasunod ini sa layi matapos nga gin-aresto siya sang mga pulis.
Sa interview sang Bombo Radyo Bacolod kay Councilor Agustin ‘Nene’ Grande, ginpanginwala sini ang akusasyon nga kaistorya niya ang mga suspetsado sa ambush site, pila ka minutos antes ang paglabay sang convoy ni Vice Mayor Ella Celestina Garcia-Yulo.
Panindugan sang konsehal, nagapangampanya sila sa kaiping nga Barangay Magallon Cadre sang magluntad ang ambush kag may testigo suno sa iya nga makapamatuod sini.
Suno diri, nag-istoryahanay sila ni Police Regional Office 6 director Brigadier General John Bulalacao kag iya ginpasalig nga magakooperar ini sa imbestigasyon.
Suno kay Grande, wala siya sang ideya kun sin-o ang nagtudlo sa mga pulis nga nasiplatan siya sa ambush site kag kaistorya sini ang mga suspetsado antes ang paglabay sang convoy ni Yulo.
Indi man kilala sang konsehal ang isa pa gid ka persona nga gindakop sang mga pulis kadungan sang hot pursuit operations.
Si Grande ang utod sang bodyguard ni Moises Padilla Mayor Magdaleno ‘Magsie’ Peña nga ginpatay sadtong Mayo 1 tuig 2015.
Una na nga ginpahayag ni Yulo sa interview sang Bombo Radyo Bacolod nga si Peña ang mastermind sa ambush apang wala pa nakasabat ang alkalde may kaangtanan diri.
