Natukiban nga may pila ka cracks sa kilid sang dalan sa highway sa Barangay Mambaruto, Sipalay City bangod sa padayon nga pag-usmod sang duta.
Duha ka semana ang nakaligad sang nagpatigayon sang pagpanglimpyo ang Department of Public Works and Highways (DPWH) sa kanal sa kilid sang dalan sang aga apang sang ila ginbalikan ang lugar sang hapon, natabunan na sang duta ang kanal kag may yara sang cracks sa ibabaw nga portion sang duta.
Suno kay Sipalay City Disaster Risk Reduction and Management Office Head Dionelo Bogtae, nagpatigayon ang Mines and Geosciences Bureau sang ground penetrating survey apang ginahulat pa ang final result halin sa national office.
Sa karun, ginakontrol anay ang paglabay sang mga dalagko nga mga trucks sa dalan nga indi magdungan.
May yara sang nagabantay sa pihak kag pihak sang dalan para magpahibalo agud bulos-bulos ang paglabay sa area samtang ang mga light vehicles naman wala problema nga maglabay sa highway.
