Patay ang criminology student nga driver samtang malala man ang samad sang tatlo ka iban pa matapos magsapok ang duha ka mga motorsiklo sa Purok Mars, Barangay Ma-ao, Bago City.
Ang napatay ang ginkilala nga si Vince Miguel Villanueva, 22 anyos, residente sang Barangay Mailum, Bago City, 3rd year criminology student sa Bago City College.
Sa interview sang Bombo Radyo Bacolod kay Police Corp. Kim Iver Cornel, traffic investigator sang Bago City Police Station, si Vince Miguel ang gikan sa eskwelahan angkas ang iya manghod nga si Bevien Villanueva kag sila ang nagabyahe sa Barangay Ma-ao padulong sa Barangay Mailum kapin alas-6:45 sang gab-i.
Samtang sugata naman nila ang motorsiklo nga ginadrive ni Vince Lantosa, 24 anyos, residente sang Barangay Bacong, Bago City, education student sa isa ka eskwelahan sa banwa sang Murcia.
Suno kay Cornel, angkas ni Lantosa ang iya tiyo nga si Felipe Chavez.
Pahayag sini nga sila ang nagabyahe gikan sa Brgy Mailum padulong sa Brgy Ma-ao agud magbakal sang bulong sa highblood sang tiyo.
Sa karun padayun pa ang imbestigasyon, kun ano ang gintunaan sang pagbunggu-anay bangod makita nga yara sa center lane ang impact, samtang may-ara man sang sola street light sa area.
Bangod sa makusog nga pagbunggu-anay, lunsay naglabog sa ila mga motorsiklo ang apat ka biktima.
Ang mag-utod nga Villanueva ang gindala sa Bago City Hospital, apang gindeklarar nga dead on arrival ang driver.
Samtang ang magtiyo naman ang ginrefer sa ospital sa Bacolod bangod kritikal ang kondisyon, kag tubtob sa karun nagapabilin pa nga unconscious.
Wala naman sang naka-inom sang makahulubog nga ilimnon sa mga biktima.
