Magahinun-anon ang lider sang pila ka transport group sa Bacolod City sa pamunuan sang Land Transportation Franchising and Regulatory Board Region 6 (LTFRB 6) sa Miyerkules, Pebrero 26.
Sa interview sang Bombo Radyo Bacolod kay Rudy Catedral, presidente sang Bacolod Alliance of Commuters, Operators and Drivers (BACOD) – Manibela, upod sa pamunuan sang United Negros Drivers and Operators Center (UNDOC) kag Kabakod Negros Transport Coalition Incorporated (KNETCO) ang magapadulong sa Iloilo dala ang Resolution No. 102 sang Bacolod City Council nga nagarequest sa LTFRB nga mahatagan sang prangkisa ang tanan nga public utility jeepneys.
Suno diri, nakaligad pa napagwa ang resolusyon apang sa Miyerkules pa sila nakalusot sa appointment kanday LTFRB 6 director Richard Osmeña kag LTFRB 6 legal counsel Atty Salvador Altura Jr.
Ang resolusyon ang nacopy furnish man sa LTFRB Central Office, Department of Transportation (DOTr) kag kay President Ferdinand “Bongbong” Marcos Jr.
Ginpasalamatan man ni Catedral ang pagbulig sang Bacolod City Council, kag kun mapahanugutan, ini ang labing una sa Pilipinas nga nangin madinalag-on ang kawsa sang mga unconsolidated traditional jeepneys.
Nagapati ini nga sila ang paga-updan man sang mga drivers kag operators sa Iloilo.
Magluwas sa luyag nila mahibal-an ang sabat ni Osmeña sa resolusyon sang Bacolod City, kasubong man ang nahanungod sa sala nga datos sang porsyento sang nagpaconsolidate nga ginapasa sa LTFRB National Office.
Pahayag ni Catedral nga may libo na nga mga traditional jeepney nga nagsulod sa consolidation process paagi sa Cebu People’s Cooperative ang nahatagan na sang prangkisa apang nagback-out sa programa matapos sang internal conflicts.
Suno diri, ang mga nagwithdraw ang makabig naman nga unconsolidated apang may prangkisa, gani ginapanawagan sang mga ini nga mangin patas kag sila ang hatagan man.
Sa tion nga makakuha na sang prangkisa, ang mga ini ang makaproseso naman sang Mayor’s Permit.
