Makaligad ang lima ka adlaw humalin sang ini ang namissing, nagakaagnas na ang bangkay sang 14 anyos nga dalagita sang masapwan sa kampo sang tubo sa Hacienda Phoenix, Brgy. Binubuhan, Bago City, Negros Occidental kaina sang aga.
Ang biktima nga si Jemia Rose Oliveros sang Purok Francisco, Brgy Binubuhan ang naglakat sang Enero 1 sang udto agud kuhaon ang cellphone nga ginpacharge sa balay sang abyan sang iya amay, duha ka kilometro nagikan sa ila balay apang wala na kaabot diri ang grade 8 student kag wala man siya nakapauli.
Diri na nagsugod ang iya pamilya sa pagpangita sa iya.
Kaina sang aga, natingala ang mga nagatapas sang tubo sa Hacienda Phoenix nga may nagapanimaho gani ila ginpangita kag nasapwan ang bangkay ni Oliveros nga nagakaagnas na.
Ang biktima ang may busal sa baba, ginpasaka ang iya nga bayo kag bra, wala na sang shorts kag panty kag madamo sang lagob.
Sa interview sang Bombo Radyo sa tiyo nga si Angelo Oliveros, wala na ang iban nga tudlo sang iya hinablos samtang nakakas naman ang iya mga kuko sa iban nga tudlo sa kamot.
Magluwas diri, buka ang ulo sang biktima apang wala sang nakit-an nga pilas tuga sang pagbuno.
Suno kay Angelo, mahimo nga ginlampusan ang ulo sang dalagita kag ini ang ginhimuslan.
Ang amay sang biktima ang nagatrabaho sa kampo sang tubo samtang yara sa Metro Manila ang iya iloy.
