Gilayon man nga ginresponderan sang Kabankalan City Government ang nagluntad nga pagcollapse sang barangay road sa Sitio Banga, Barangay Camingawan, Kabankalan City kaina sang aga.
Sa interview sang Bombo Radyo Bacolod kay Kabankalan City Mayor Benjie Miranda, matapos mabaton ang report tuhoy sa natabo nga landslide gilayon man sini nga ginpakadtuan sa City engineer’s, general service officer kag disaster risk reduction and management ang lugar agud masolusyunan ang problema.
Suno sa alkalde ang dalan ang nagaisahanon nga alagyan kun ma gwa gikan sa Barangay Carol-an, gani agud indi mastranded ang mga pumuluyo kag magapadulong sa barangay gilayon nila ginhimuan sang paagi agud mangin passable ang dalan.
Paathag sang alkalde nga indi lamang motorsiklo ang nagalabay sa lugar kasubong man mga salakyan.
Magapangita pa sang budget ang alkalde nga sarang mareallign agud marehabilitate ang dalan.
Ginalantaw sini nga bangod sa El Niño kun sa diin naglitik ang mga duta nga ginsundan sang mga pag-ulan nga kaangay nga senyales na sang nagahilapit nga La Niña, naghumok ang duta nga pundasyon sang barangay road.
Pasalig ni Miranda nga wala sang pamalay nga apektado sang pagkatiphag sang duta.
Panawagan sini sa mga residente nga kun may makita nga posibilidad nga mahimo matiphag ang duta sa ila nga lugar, mas maayo nga mag-evacuate sang temprano.
Sa karun, nagkulukanay naman ang tiyempo sa ciudad sang Kabankalan.
