Target sa karon sang Dallas Mavericks nga makabawi sa Game 2 sang NBA Finals batok sa Boston Celtics.
Kahapon, gilayon nga naka-record sang 20 points si Kristaps Porzingis sa pagbalik sini sa court kaupod ang Boston Celtics matapos ang 10-game absence sini.
Nangin madinalag-on ang Boston batok sa Dallas Mavericks sa score nga 107-89 sa Game 1 sang NBA Finals.
Wala nahimo ni Porzingis nga makahapamang humalin sa Game 4 sang Boston sa first-round series batok sa Miami Heat bangod sa injury sini.
Apang, wala naman nakitaan sang pagbag-o sa hampang ni Porzingis apisar sa madugay sini nga pahuway.
Samtang, ginpangunahan naman ni Jaylen Brown ang Boston sa 22 points, three steals kag three blocks.
Ini ang ginsundan sang 16 points ni Jayson Tatum kag 15 points ni Derrick White.
Samtang, sa bahin naman sang Dallas, nakarecord si Luka Doncic sang 30 points kag 10 rebounds.
Ini ang ginasundan ni P.J. Washington sa 14 points, Jaden Hardy sa 13 points kag Kyrie Irving -nga nagbaton sang ‘boos’ gikan sa crowd- ang nakarecord sang 12 points.
Para sa basketball coach sa ciudad sang Bacolod nga nag-insakto ang ginalantaw sini antes nga hampang nga indi lang magdako ang pondo sang Boston Celtics mahimo pa ini mabadbad sang Dallas Mavericks.
Suno kay Leo Ceralbo, duha lamang ang nagapamuntos sa Dallas kun sa diin si Luka Doncic kag Kyrie Irving ang nangin scoring machine sang nasambit nga team.
Suno kay Ceralbo, sa third quarter, nakita naman nga nangin foul trouble na si Kyrie Irving kag siya ang ginmarkahan sang players sang Celtics.
Suno pa diri, sa first half gid natam-an ang Mavericks bangud sa 27 ka haboy nga 3 points, onse ang napasulod sang Celtics.
Ginpahayag man sang Basketball coach nga kulang ang suporta kay Doncic kag Irving bangud ang kaangay nga wala nagbulig ang teammates indi pareho sa Celtics nga maayo ang suporta.
Pagabantayan naman ang Game 2 sang NBA Finals sa Hunyo 10, Lunes, alas- 8:00 sang aga, oras sa Pilipinas.
