Gin-athag sang mga otoridad sa Davao City nga indi matuod nga naka-lock down ang ciudad.
Suno kay Police Regional Office (PRO) Davao Region Spokesperson Police Major Catherine Dela Rey, wala nagmando ang kapulisan sang city-wide lockdown apang ang National Highway padulong sa compound sang Kingdom of Jesus Christ kag Davao International Airport ang indi maagyan bangud sa nagapadayon nga mga protesta batok sa tuyo nga pag-aresto sa leader sang KOJC nga si Apollo Quiboloy.
Gin-athag man ni Councilor Atty. Luna Acosta nga indi matuod-tuod nga naka-lock down ang ciudad kag bukas sa karun ang exit kag entry points.// Suno sa iya, apisar nga sarado ang gate sang airport, wala naman sang flight nga nakanselar.
Pila naman ka mga miyembro sang KOJC ang nagpatigayon sang rally sagwa sang compund kag nagpanawagan sang pagbiya ni President Ferdinand “Bongbong” Marcos Jr. sa pwesto bangud sa ginaalegar paglapas sini sa tawhanon nga kinamatarong.
Kahapon, nagpagwa man sang statement si Vice President Sara Duterte nga nagakondenar sa pagserbe sang warrant of arrest sang kapulisan sa 30 ka hektarya nga compound sang KOJC.
Suno sa bise presidente, ini ang nagapakita lamang sang pagluib sa kaugalingon nga pungsod kag pagka Pilipino.
Ginkwestyon pa ni Duterte ang pagpatuman sang nasambit nga warrant of arrest bangud ang akusado ang isa ka tagasuporta sang ila pamilya.
Sa nasambit nga statement, nagpangayo ang bise presidente sang pasaylo sa mga miyembro sang KOJC bangud sa pag-ayo kag pagpilit sang mga ini nga botohon sa 2022 elections ang iya nga running mate nga si Presidente Marcos Jr.
Suno diri, ang mga Pilipino ang nagakihanglan sang maayo nga lider.
