Nagahingyo ang mga tenants sa Manokan Country kay Bacolod City Mayor Alfredo “Albee” Benitez nga mahatagan sila sang permanente nga mapwestuhan nga makapadayon sa ila pagbaligya kag matawag sa gihapon nga Manokan Country samtang padayon ang construction sang bag-o nga structure.
Sa interview sang Bombo Radyo Bacolod kay Tess Mondres, tenant sa Manokan Country, ang ginahingyo lamang nila sa alkalde amo ang mapangitaan sila sang lugar nga permanente nga masayluhan.
Suno kay Mondres, bangud mahalin na sila sa lugar nga ila ginabaligyaan sa kapin apat ka dekada, nagaayo lamang sila sang lugar nga ila permanente nga masayluhan.
Suno diri, indi sila magpwesto sa sulod sang isa ka mall sa tabok sang Manokan Country bangud mahal na katama ang renta.
Suno diri, mas mabudlayan sila magbayad sang renta kun sa sulod sang mall bangud nabudlayan na nga daan sila sa karon magbayad nga yara sa daan nga Manokan Country.
Samtang, ginatun-an pa sang ciudad kun mahimo ang mga ini nga makapwesto sa likod sang Bacolod City Government Center.
Madumduman nga tubtob na lang subong nga adlaw, July 5 ang ginhatag nga tion sang ciudad para makasaylo na ang mga tenants sa temporaryo sini nga pwesto sa parking area sang SM sa atubang lamang sang Vendor’s Plaza agud mga masuguran na ang construction sang bag-o nga Manokan Country.
Magatinir ang mga ini sa temporary area sa sulod sang 18 ka bulan kag magasaylo sa tion nga matapos na ang redevelopment sang daan nila nga pwesto.
