Naanad na kag naintindihan sang principal sang Handumanan Elementary School 2 ang delay sa paghatag sang school supplies halin sa Local Government Unit sang ciudad sang Bacolod.
Sa interview sang Bombo Radyo Bacolod kay Leo Ceralbo, naanad na ini nga may delay sa pagpanagtag sang school supplies kag naintindihan man sini nga may yara sang CEMELEC spending ban kag may proseso sang bidding para diri.
Suno kay Ceralbo, sa general assembly nga ginpatigayon kaupod ang mga ginikanan, nag-instruct ini nga tag-isa ukon duha lang ka notebook, papel kag lapis lang ang baklon para sa estudyante bangod may yara man sang libre nga school supplies nga ginapa-abot.
Pahayag sini, wala sang problema nga madelay ang pagpanagtag basta ang importante nga makalab-ot lang ini sa mga estudyante ilabi na sa karun nga nabudlayan ang mga ginikanan kadungan sa nagasaka nga presyo sang mga balaklon.
Ginpahayag man ni Ceralbo nga magatakop ang school year 2024-2025 sa Abril 15 kag ang bag-o nga school year ang magabukas sa Hulyo 2025.
