Nagadangat sa 787 ang delegasyon sang Negros Occidental sa Negros Island Region Athletics Association Meet 2026.
Sa interview sang Bombo Radyo Bacolod kay Dency Grace Padillon, Division Sports Officer sang Negros Occidental delegation, 626 ang ila nga mga atleta, kag ang nabilin amo ang mga coaches, assistant coaches kag iban pa.
Suno diri, ang ila nga mga players ang gikan sa 10 ka division sa probinsya.
Sa Negros Occidental High School ang ila nga mangin billeting area.
Suno kay Padillon, wala man sila sang problema sa billeting school, samtang nagapasalamat man ang mga ini sa provincial government sa pagpahulam sang Panaad Park and Stadium agud mangin training ground sang pila ka atleta partikular na sa patag sang athletics kaangay sang track and field.
Suno diri, matapos sang Provincial Meet, nag-umpisa naman sa training ang mga nagdaog nga atleta sa Panaad.
Nagalaom naman si Negros Occidental Governor Eugenio Jose “Bong” Lacson nga madamo sang mahakot nga gold medal ang probinsya sa NIRAAM 2026.
Suno kay Lacson, luyag sini nga makita nga ang mga atleta gikan sa Negros Island Region nga magacompete sa Palarong Pambansa ang kalabanan gikan sa Negros Occidental.
Ini ang mangin dako naman nga dungog ilabi na nga ini man ang una nga pagpasakop sang Negros Island Region bilang bag-o nga rehiyon sa Palarong Pambansa.
