Patay ang isa ka delivery rider matapos aksidente nga mabungguan ang ginamaneho nga motorsiklo sang ceres bus sa National Highway sa Sitio Buhian, Barangay To-oy, ciudad sang Himamaylan, Negros Occidental, kaina alas 3:50 ang takna sang hapon, Huny 30.
Ginkilala ang biktima kay Hernan Panaligan, 41-anyos, kasado kag residente sa Baranggay III-Poblacion, ciudad sang Himamaylan samtang ang driver sang ceres bus ang ginkilala kay Julian Jenon, 48-anyos, kasado kag residente naman sa Sitio Mombay, Barangay Talacdan banwa sang Cauayan, Negros Occidental.
Sa interview sang Bombo Radyo Bacolod kay Police Lt. Col. Anthony Grande, Chief of Police sang Himamaylan City Police Station, ang Vehicle 1 ukon ang Ceres Bus nga may plate number nga FWU 290 ang nagabiyahe sa National Highway padulong sa Bacolod City sang aksidente nga nabungguan ang Kawasaki Barako 175 CC nga ginamaneho sang biktima nga nagabiyahe sa opposite nga direksyon nga hinali lamang nga nagliko kun sa diin ginkaon sini ang lane sang ceres bus.
Gintinguhaan pa kuntani sang driver sang bus nga malikawan ang motorsiklo apang nalab-ot niya gid ini.
Bangud sa impact ang biktima ang nakaagom sang patal nga samad sa ulo kag paa kag gindala man gilayon sa Gov. Valeriano M Gatuslao Memorial Hospital apang gindeklarar nga dead on arrival.
Wala naman sang nasamaran sa pasahero sang ceres bus.
Yara sa karun sa Himamaylan City Police Station si Jenon samtang nagapadayon pa ang imbestigasyon sang mga kapulisan sa nagluntad nga aksidente.
Nakadepende naman sa pamilya sang biktima kun magapasaka ang mga ini sang kaso batok sa driver sang bus.
Samtang natalana naman nga magaestoryahanay bwas ang pamilya sang biktima kag ang management sang ceres bus.
