Ginalauman nga magasaka ang demand sa supply sang ilegal nga druga sa sini nga paskwa.
Sa interview sang Bombo Radyo kay Police Colonel Joeresty Coronica, bangud nga season sang paskwa madamo sang kwarta ang pila ka mga tawo rason nga magataas ang demand sang ilegal nga druga.
Suno kay Coronica, nagatinguha ang mga kapulisan sang Bacolod City agud nga mabantayan ang mga nagasulod nga druga sa ciudad sang Bacolod.
Suno diri, madamo sila sang ginabantayan nga mga entry points kun sa diin posible nga alagyan sa mga nagasulod nga ilegal nga druga.
Suno diri, mabudlayan ang mga kapulisan bangud sang madamo nga entry points sa ciudad kag indi masiguro nga mablock ang tanan nga alagyan.
Dugang pa, nag-coordinate na ang mga ini sa Coast Guard Station Northern Negros Occidental agud nga masiguro nga ma-tsekyar ang mga dala sang mga pasahero nga nagasulod sa ciudad kag wala sang ilegal nga druga ang makasulod.
Sa pihak nga bahin, Dakop ang 21 anyos nga lalaki sa ginpatigayon nga drug buybust operation sang Bacolod Police Station 3 kun sa diin ang suspect ang anay preso sa kaso nga illegal gambling.
Ang suspek ang ginkilala nga si John Lloyd Casabuena, wala sang trabaho kag residente sang Purok Langis, Brgy Banago, Bacolod City.
Sa interview sang Bombo Radyo kay Police Capt Ramie Sayson, Officer in Charge sang Bacolod Police Station 3, tatlo ka semana tubtob isa ka bulan ang monitoring kay Casabuena tubtob nga natigayon ini nga nadakpan.
Suno diri, narekober ang kapin 7 grams sang suspected shabu nga may standard drug price nga P47,600.
Sa karun yara na sa kustodiya sang Bacolod Police Station 3 si Casabuena nga magapangatubang sang nagakaigo nga kaso.
