Igalunsyar na sang city government sang Bacolod ang kampanya sang Department of Health (DOH) nga Deng-get-out bwas nga adlaw, Agosto 28.
Ini ang kasunod sang pagsapol kahapon ni Mayor Evelio Leonardia kag iban nga opisyal lakip na ang City Health Office sa mga punong barangay sa ciudad.
Sa 61 ka punong barangays, 52 lang ang nakatambong apang iban ang nagpadala lamang sang mga representante.
Apang may yara gid sang barangay nga wala nakatambong ang kapitan kag wala man sang reprsentante kag ini ang ginalakipan sang Barangays 10, 24, 30 kag Tangub.
Ang nasambit nga kampanya sang DOH ang nagahaylo sang pagpatigayon sang dululungan nga pagtinlo sa palibot tagsa alas-4:00 sang hapon ukon ang “Sabayang 4:00 o’clock habit para Deng-get-out”.
Kadungan sang natalana nga launching sang programa, ginhingyo man sang alkalde ang simbahan nga magbagting sang lingganay tagsa alas-4:00 sang hapon, subong man sa mga panimalay ang pagpaltog sang anuman nga pagahod lakip na ang kaldero kag ang pagtukar sang sirena sang mga ambulansiya.
Ang gahod ang senyales nga dapat maguwa na anga pumuluyo sa ila pamalay kag magpaninlo.
Samtang nagapahanumdom naman si Councilor Cindy Rojas, chairman sang Committee on Health sa city council, nga indi lamang iya sang gobyerno ang obligasyon sang pagtinlo sa palibot kundi iya sang tanan nga pumuluyo.
