Gin-deklarar na sang lokal nga pag-gobyerno sang banwa sang Murcia ang dengue outbreak sa lugar kasunod sa pagtaas sang kaso.
Sa interview sang Bombo Radyo Bacolod sa Provincial Health officer nga Dr. Ernell Tumimbang, ginpahayag sini nga base sa narekord nila sa Provincial Health Office, naglab-ot na sa 147 ang kaso sang dengue sa banwa sang Murcia humalin Enero 1 tubtob Hulyo 13 sa diin isa ang patay.
Sa nasambit nga numero suno kay Tumimbang, kun ini ang iga-kumparar sa nakaligad nga tuig nga kaso, nagsaka na ini sa 390% sa diin nalapawan na sini ang epidemic threshold.
Suno sa iya, ang banwa sang Murcia ang pinaka-una nga lugar nga gin-deklarar sa dengue outbreak sa bug-os nga probinsya sang Negros Occidental sa diin ang may pinakadamo nga kaso sa banwa amo ang Barangay Minoyan.
Ginpahayag man ni Tumimbang nga isa sa mga rason kun ngaa madamo ang kaso sang dengue sa isa ka lugar, ini bangud man sa kadamuon sang populasyon, kag posible nga may yara sang breeding site sa lugar.
Samtang, naga-panawagan naman ni Tumimbang sa publiko nga pirmi limpyohan ang ila palibot kag indi gid mag-patinir sang tubig nga mahimo istaran sang lamok.
Date of airing: August 1 (Bombo News and Views Morning Edition)
