Nakadepende pa sa resulta sang assessment kun ipadayun ang ginapatuman nga pilot implementation sa flexible work arrangement nga alas-7:00 sang aga tubtob alas-7:00 sang gab-i sa Department of Environment and Natural Resources – Negros Island Region.
Sa interview sang Bombo Radyo Bacolod kay Engr. Joan Nathaniel Gerangaya, Assistant Regional Director for Technical Services sang DENR-NIR, sa ila pa lamang ginpatuman ang test run nga ginsuguran sang Enero 5 tubtob sa Marso 27.
Ginalantaw diri kun epektibo ang pagpatuman sang flexible work arrangement sa kabug-usan nga ahensya, ilabi na sa karun nga madamo sang mga bagyo kag iban pa nga kalamidad.
Luwas sa 7:00 am to 7:00 pm nga schedule, may ginapatuman pa gihapon nga 8:00 am to 5:00 pm nga schedule.
Isa man sa purpose nga nakita sa 7:00 am to 7:00 pm nga work schedule amo ang pagbuhin sang expenses partikular na sa kuryente, tubig kag gatong sang mga salakyan bangod ang mga personnel ang magaduty lamang Lunes tubtob Huwebes.
Samtang ang 8:00 am to 5:00 pm schedule naman ang maga-opisina Lunes tubtob Huwebes, samtang work-from-home naman kun Biyernes.
Apang luwas diri, may mga personnel man nga kinahanglan yara pito ka adlaw sa isa ka semana, kaangay sang mga forest rangers kag park rangers.
May skeletal force man nga ginapabilin sa opisina agud nga maseguro nga may makabatun gihapon sang kliyente kun kinahanglan, agud indi ma-utod ang pagserbisyo.
Panugyan ni Gerangaya sa mga kliyente nga mas maayo nga magtransaksyon sa DENR-NIR sa adlaw sang Lunes tubtob Huwebes, nga segurado nga yara sa opisina ang tanan nga personnel.
