Nagpatigayon sang inspection sa bahin sang Bulkan Kanlaon ang mga personnel nagikan sa Department of Environment and Natural Resources (DENR) Negros Island Region (NIR).
Ini ang kasunod sang nagluntad nga rockslide sa Canlaon City, Negros Oriental sang naglaslas ang Bagyo Tino sang tinalikdan nga semana.
Nahibaluan nga 20 ang recorded nga napatay samtang pito pa ang missing sa nasambit nga ciudad.
Sa interview sang Bombo Radyo Bacolod kay DENR-NIR Director Charlie Fabre, ginpakadtuan sang mga ini ang kabukiran sang Canlaon City agud nga matumod ang gintunaan sang nagluntad nga rockslide kag volume sang tubig nga rason sang pagbaha sa Canlaon City.
Suno kay Fabre kun lantawon sa malayo may yara sang nagluntad nga landslide apang indi pagid mahibaluan kun ini ang rason sang mga nagligid nga mga bato sa ciudad.
Nagapadayon man ang imbestigasyon sang Mount Kanlaon Natural Park, Mines and Geosciences Bureau kag team nagikan sa Manila agud matumod ang gintunaan sang rockslide nga nagtuga sang dako nga halit sa mga residente sang Canlaon City, Negros Oriental.
