May P35 million nga gin-alokar ang Department of Agriculture (DA) sa pagbakal sang chemical kag pagpatigayon sang drone operations batok sa nagaduging nga halit sang red-striped soft scale insect (RSSI) sa mga katubohan partikular na sa Negros Island kag Western Visayas.
Suno sa DA, ang drone operations ang inisyal nga maka-cover sang 5,000 hectares sang mga katubohan tubtob sa 45,000 hectares kun magalala pa gid ang pagkalat sang peste.
Ginpahayag ni Agriculture Secretary Francisco Tiu Laurel Jr. nga tinutuyo sini agud maprotektahan ang industirya nga nagsuporta sa linibo ka mga mangunguma, mamumugon kag ang ila mga pamilya.
Sa kabug-usan nga 421,606 hectares sang katubohan sa bilog nga pungsod sa subong nga crop year, 93,898 hectares diri ang apekatado sang RSSI kag 92,295 ang makita sa Negros Island kag Western Visayas.
Ginabanta 12,700 ka mga mangunguma naman ang naapektuhan sang nasambit nga peste.
Nahibaluan nga magahatag ang DA sang P10,000 nga ayuda sa tagsa ka berepikado nga apektado nga mangunguma bilang immediate relief.
Samtang, ang Sugar Regulatory Administration (SRA) ang magahatag sang geotagged infestation data, technical support, kag validated estimates sang mga apektado nga lugar nga magabulig para sa local interventions batok sa RSSI.
