Luyag sang gobyerno nga magtukod sang kaugalingon nga strategic petroleum reserve para sa Pilipinas.
Sa isa ka press conference, ginpahayag ni Energy Secretary Sharon Garin nga tinutuyo sini nga mag-stock sang mas madamo nga supply sang langis luwas pa sang mga reserba sang mga pribado nga kumpanya.
Suno kay Garin, mangin sistematiko kag mas organisado ang ini nga sistema bangud may ara na sang nagakaigo nga kaugalingon nga reserba sa Pilipinas nga masarangan ang bisan ano nga kakulangan sang supply gikan sa mga ginakuhaan sang langis sa nagkalain-lain nga pungsod.
Pahayag sang tiglikom, nakigkoordinar ang Department of Energy (DOE) sa Philippine National Oil Company (PNOC) kag Maharlika Investment Corporation (MIC) para mapatuman ang ini nga proyekto.
Paathag ni Garin, ini agud indi na mabug-atan ang mga pumuluyo kag maprotektahan ang mga programa kaagay sang TUPAD sang Department of Social Welfare and Development (DSWD) kag iban pa nga health service sang Department of Health (DOH).
Gani, ginatun-an nila kun paano makapangita sang iban pa nga makuhaan sang pondo.
Samtang, gamiton sang PNOC ang mga ginapanag-iyahan nga duta kag pasilidad sa nagakalain-lain nga bahin sang pungsod bilang mga posible nga lokasyon sang reserba sang langis.
