BACOLOD CITY-Pila ka mga tikang ang ginhimo sang Department of Education sa probinsya sang Negros Occidental agud masiguro ang kaluwasan sang mga estudyante batok sa 2019 novel coronavirus acute respiratory disease (2019 NCOV-ARD).
Sa interview sang Bombo Radyo kay Dep-Ed Division of Negros Occidental Spokesperson Ian Arnaez, ginpahayag sini nga suspendido ang mga national kag regional events kag wala naman gina-engganyo ang mga aktibidad nga kaangay sang junior and senior prom, field trip kag mga camp.
Apang suno sa iya, kun luyag sang eskwelahan nga padayunon ang nasambit nga mga aktibidad, kinahanglan sini nga magkuha sang clearance sa local health office.
Suno kay Arnaez, nagapadayon ang mga ini sa pagmonitor kag kampanya sang awareness sa mga estudyante.
Gina-track man sang mga ini ang travel history kag daily health status sang mga kabataan.
Suno sa iya, gina-engganyo man ang mga eskwelahan nga magpatigayon sang regular mass handwashing kag pahanumduman ang mga kabataan nga magdala sang alcohol kag sanitizer ilabi na sa mga eskwelahan nga wala sang maayo nga water source.
Nagalaom man si Arnaez nga gilayon nga matapna ang nasambit nga virus agud matigayon ang mga aktibidad nga ginsuspender kag wala sang kahangaw-an sa nagalapit nga graduation.
