Nagpagwa sang advisory ang Department of Foreign Affairs (DFA) para sa mga Filipino nurses nga nagapangita sang trabaho sa New Zealand nga maghalong bangud sa karun wala sang trabaho nga ginatanyag para sa foreign nurses ukon Internationally Qualified Nurses (IQNs).
Ang nasambit nga pahanumdom ang nagikan sa Embahada sang Pilipinas sa Wellington, New Zealand matapos mahibaluan nga may pila ka mga indibidwal kag mga agency nga nagatanyag nga magpafacilitate sa paghire sang mga foreign nurses padulong sa New Zealand gamit ang visitor visa para makakuha sang Comprehensive Assessment Program (CAP) ukon Objective Structured Clinical Examination (OSCE) para sa mga nurse kag maka-apply sa ulihi sa registration sang Nursing Council sang New Zealand.
Paathag naman sang DFA nga apisar nga legit ang proseso ang pagkuha sang nasambit nga tests agud nga makapagpractice sang nursing sa New Zealand, wala ini nagagarantiya sang ubra bangud nakadepende ini sa nagkalain-lain nga factors kaangay sang local demand para sa nurses kag abilidad sang mga employer sa health sector nga maghire.
Suno sa embahada, nakabaton sila sang mga reports nga may mga nagbiyahe nga Internationally Qualified Nurses sa New Zealand gamit ang visitor visa nga pilit nga ginpahalin sang pungsod sang maexpire na ang ila nga visa bangud wala sang Nakita nga ubra bangud nga wala sang job opportunites sa karun para sa nurses.
Kaangot sini, nagpanugyan ang Embahada sa mga Pilipinong nurse nga siguruhon nga may yara sang ubra nga masudlan sa nasambit nga pungsod antes maghalin sa Pilipinas kalakip na ang legitimate job offer nga may verified contract halin sa accredited employer kag working visa nga gin-issue sang Immigration sang New Zealand.
