Ginkumpirmar sang provincial director sang Department of the Interior and Local Government nga nagapadayon pa ang ila pagbaton sang mga aplikante para sa contact tracers sang ahensya.
Sa interview sang Bombo Radyo kay Atty. Ferdinand Panes, gin-engganyo sini ang mga pumuluyo sang Negros Occidental kag Bacolod nga nagauyat sang Bachelors Degree kag kwalipikado nga mangin contact tracer nga magsumiter sang application letter, transcript of record, letter of intent, resulta sang drug test kag NBI clearance sa ila nga email ukon ihulog ini sa drop box sang ila opisina.
Suno kay Panes, ang 1,000 ka mga contact tracers nga target nga mahire sang DILG sa rehiyon ang magaserbe sa bulan sang Oktubre tubtob Disyembre apang posible pa nga ma-extend kun indi magnubo ang kaso sang COVID-19 sa Pilipinas.
Suno sa regional director, masobra 400 pa lang ka mga aplikante ang ila nabaton kag kahapon, 78 sa mga ini ang nagpaidalum sa interview.
Sa nasambit nga numero, kalabanan diri ang mga criminologist gani nagakalipay ini bangud related man ang kurso sa pag-imbestigar nga ginahimo man sang mga contact tracers apang suno sa iya, kun graduate sang medical course ang aplikante, gilayon gid ini nga mahire.
Suno diri, sa Setyembre 23 ang deadline sang submission sang rehiyon sa national office apang magapadayon sila gihapon sa pagpatigayon sang interview.
Gani nagpanawagan ini sa mga wala sang trabaho nga ikonsiderar ang pag-apply bangud makasweldo na ang mga ini, makabulig pa sila sa gobyerno.
Nahibaluan nga masobra P18,000 ang pagabatunon nga sweldo sang contact tracers kada bulan apang contractual lang ang mga ini.
