Magadiskusyon ang alkalde sa ciudad sang Bacolod sa Department of Public Works and Highways Region 6 angot sa pagbukas sang diversion channel.
Nahibaluan nga sa nauna nga pasalig, pagabuksan ang diversion channel sang Disyembre 15, 2025 apang wala man natigayon.
Sa pahayag ni Bacolod City Mayor Greg Gasataya, sang magbisita si President Ferdinand “Bongbong” Marcos Jr. sa ciudad, ginpresentar sang DPWH ang pagbag-o sang desinyo.
Apang suno sa alkalde, ang luyag lamang nila nga mangin operational na ang diversion channel agud indi na masulit ang problema sa malala nga pagbaha.
Panindugan ni Mayor Greg nga dapat i-tap na sa diversion channel ang mga local drainages gikan sa nagkalainlain nga Barangay agud may ma-awasan sang tubig sa tion sang mabaskog nga pag-ulan.
Ginaduso sini nga ipalagas na lamang kun ano man ang luyag nga mechanical equipments.
Madumduman nga naglawig man sadto ang proyekto bangod sa plano nga pagbutang sang floodgate kag pumping station, nga temporaryo nga ginpa-untat agud mapatemprano kuntani ang pagbukas sang diversion channel.
