Ginduso sang isa ka mamalidha sa Kamara ang pag-nominate sa comedy king nga si Rodolfo “Dolphy” Quizon Sr. para sa Order of National Artists.
Sa isa ka statement isa ka adlaw antes ang ika-13 nga death anniversary ni Dolphy sang Myerkules, gin-anunsiyar ni Manila 3rd District Congressman Joel Chua nga nag-file ini sang House Resolution (HR) No. 41 sang nagligad nga Hulyo 9 nga nagahingyo sa House nga manduan ang committee on creative industries kag committee on basic education nga magpatigayon sang mga hearing kag meeting sa nasambit nga butang.
Nakasaad sa resolution nga si Dolphy ang ginhatagan sang Grand Collar of the Order of the Golden Heart (OGH) bilang pagsunod sa Honors Code of the Philippines ni anay President Benigno S. Aquino, Jr. bangud sang iya komedya nga nagdala sang kalipay sa minillion ka mga tawo kag bilang isa ka pilantropo kag sa iya pag-enganyo sang charitable kag maayo nga kawsa.
Naghingyo man si Chua nga imbitaron ang Quizon family agud nga maghatag sang inputs may kaangtanan sa posible nga nomination.
Kalakip man sa imbetaron sanday Lea Salonga kag mga opisyales sang National Commission for Culture and the Arts (NCCA), Cultural Center of the Philippines (CCP), Order of National Artist Secretariat, Film Development Council of the Philippines (FDCP), Filipino Academy of Movie Arts and Sciences (FAMAS), kag ang Movie Workers Welfare Foundation (MOWELFUND).
Sang Hunyo 11, 2012, nagtaliwan ang multi-awarded actor nga kilala sa iya comedy films.
