Ginapangita sa karun sang mga otoridad ang “doppleganger” ni Alice Guo.
Madumduman nga sang Lunes, ginpakita sa Senate hearing ang litrato sang staff ni Alice Guo nga si Catherine ukon si Cat Salazar.
Gin-ako sang assistant ni Sual Mayor Dong Calugay nga si Salazar ang nagpangita diri sang abogado nga pwede magnotaryo sang affidavit ni Alice Guo.
Sa testimonya ni Atty. Elmer Galicia sa Senado, si Guo ang nagpanotaryo sang iya affidavit sang Agosto 14 apisar nga wala niya ini nakit-an.
Gin-ako naman ni Guo nga nakahalin na ini sa pungsod padulong sa Malaysia sang Hulyo.
Nagapati ang National Bureau of Investigation nga ginhungod nga ginhimo nga doppleganger ukon paryus itsura kay Alice Guo si Salazar sa pambayo, sa buhok, pati man sa make-up kag antiparar agud magsala ang mga otoridad sa pagpangita sa iya.
Ginapatawag na sa karun sang NBI si Salazar ilabi na nga wala pa nadetalye kun diin nanago si Guo agud makahalin sa pungsod.
