BACOLOD CITY — Ginpanginwala sang magpamilya nga Eusebio nga nagapanukot sila sa mga pasyente sang catarata bisan pa nga nasulod ini sa package sang Philippine Health Insurance Corporation ukon PhilHealth.
Sa reklamo nga una naggwa kag ginpadangat sa Department of Health, naggwa ang apelyido sang mga doktor nga Eusebio nga naga-duty sa isa ka pribado nga ospital sa ciudad sang Bacolod.
Sa pagpadulong sang Bombo Radyo sa ila nga clinic, ginpahayag ni Dr. Fortunato Eusebio nga nagasukot lamang sila sang fee kun pribado ang mga pasyente kag naka-confine sa pribado man nga ospital.
Apang kun indigent ukon pigado ang cataract patient, gina-charge ang balayran sa PhilHealth nga nagabalor 16 mil pesos para sa operasyon sang isa ka mata.
Suno kay Eusebio, ang Cataract Foundation ang gina-finance sang isa ka German non-government organization apang naga-operate ini sa bilog nga Pilipinas.
Suno pa sa doktor, wala sang recruitment nga nagakatabo sa mga barangay kag nagapanukot sang balayran.
Kun may yara man sang kaangay sini suno kay Eusebio, wala sang kahilabtanan diri ang foundation ukon sila man bilang doktor.
Suno pa diri, bukas sila sa imbestigasyon sang PhilHealth agud mahibaluan ang kamatuoran.
Nahibaluan nga magluwas kay Dr. Fortunato, kaupod man sini ang iya mga kabataan nga sanday Jose kag Cristina.
