Ginpangamuyuan ni Pope Francis ang mga biktima sang “dramatic plane crash” sa South Korea.
179 ka mga persona ang nagkalamatay kag duha ang narescue nagikan sa 181 ka mga persona nga sakay sang eroplano nga nagcrash sa Muan International Airport sa South Korea sang Domingo.
Sa weekly Angelus prayer sang Santo Papa sa St Peter’s Square, ginpahayag sini nga ang iya panghuna-huna ang naga-upod sa mga pamilya sa South Korea nga nagakasubo.
Nagpangamuyo man ini para sa mga pamilya nga nagaantos bangud sa gyera sa Ukraine, Middle East, Myanmar, Sudan kag North Kivu province sa Democratic Republic of Congo.
Samtang 179 ang kumpirmado nga napatay samtang duha lamang ang nakasalbar matapos nga nagcrash ang Jeju Air flight 7C2216 sa Muan International Airport sa South Korea kahapon sang aga.
Ang duha ka survivors ang padayon naman nga ginabulong sa ospital kag ginabantayan pa ang kondisyon sang mga ini.
Ini ang santo sa latest nga report sang mga otoridad.
Suno sa report sang news agency nga Yonhap ang insidente ang natabo samtang ang Jeju Air flight 181, ang nagapatigayon sang isa ka emergency landing nga gikan sa Bangkok nga may sakay nga 181 ka pasahero.
Sa karun ginreport nga nasalbar ang isa ka pasahero kag isa ka miyembro sang crew.
Ang Boeing 737-800, ginreport nga may yara sang problema samtang nakita nga nakadanlog sa runway nga wala sang nakita nga landing gear antes nakabunggo sa pader alas 9:03 ang takna sang aga, oras sa South Korea.
Ginlaragway naman sang mga saksi nga nabatian nila ang matunog nga pagsigabong antes ang pagcrash sang eroplano sa pader sang airport nga gintunaan sang paglupok kag pagkalayo sini.
Sa interview sang Bombo Radyo kay Celestino Mercurio Jr, Bombo International News Correspondent derekta sa South Korea, nagbyahe gikan sa Thailand ang aircraft kag ini ang naglanding sa airport apang nagderetso ini sa barrier nga steel kag nabunggo.
Nag-ibwal ang kalayo sa eroplano nga gilayon man ginrespondehan sang mga bombero kag rescue.
181 tanan ka pasahero ang sakay sa eroplano kun sa diin 175 ang pasahero kag anum ang crew members samtang 173 ang South Koreans kag duha ka Thais.
Pahayag ni Mercurio, nagagwa man nga impormasyon nga ‘bird strike’ ang rason sa pagkaguba sang landing gear sang eroplano.
Ginpahayag man nga nagpadulong naman si acting South Korean President Choi Sang-mok sa Central Disaster Management Headquarters sa diin ginmando sini ang madasig nga rescue operations.
Suno diri, ang Jeju Air ang ikatatlo nga pinakadako kag barato nga airline sa South Korea.
Santo sa report ang mga napatay ang ginalakipan sang 84 ka lalaki, 85 ka babayi samtang ang genders sang 10 ka iban pa ang wala pa nakumpirmar.
Ginalantaw nga ang mga sakay nga South Koreans nga halin sa bakasyon bangud tuman na katugnaw sa South Korea.
