Umpisahan na ang dredging activity sa Sitio Tamburong, Brgy Biak na Bato, La Castellana, Negros Occidental.
Madumduman nga nagtapan na ang Tamburong Creek bangod sa mga nagsupon nga volcanic materials halin sa bulkan Kanlaon.
Sa tion nga mag-ulan, nagabaha ang area bangod indi na maka-ilig sa creek ang tubig kag nag-awas na padulong sa mga panimalay.
Suno kay Negros Occidental Provincial Administrator Atty Rayfrando Diaz, mahimo umpisahan subong nga hapon ukon bwas nga adlaw ang dredging activity gamit ang duha ka backhoe kag duha ka dump truck nga ginpadala sang provincial government.
Suno diri, ang makuha nga volcanic materials ibutang lang anay sa sulod sang compound sang Department of Environment and Natural Resources (DENR) sa Mt Kanlaon Natural Park.
Pahayag ni Diaz, umpisahan gid sa babaw tubtob sa dalom sa highway ang paghakot sang mga volcanic materials agud mahawanan ang waterways.
Mahibaluan naman kun pila ang volume sang makuha nga volcanic materials kun matapos na ang trabaho.
