BACOLOD CITY-Nakagwa na sa prisuhan ang driver nga nagamaneho sang pribado nga salakyan nga nakabunggo sa motor nga nakaparada sa Manapla, Negros Occidental, Biyernes sang kaagahon nga gintunaan sang kamatayon sang apat ka mga persona.
Madumduman nga padulong kuntani sa Cadiz City nagikan sa Isabela sanday Anabelle Estil, Rolinda Barte, Angeles Salmorin, Delia Abana, Dolores Granada kag driver nga si Froilan Samillano sang Barangay 1, Isabela.
Pag-abot sang mga ini sa Hacienda Fidel, Brgy. Tortosa, Manapla alas 2:45 sang kaagahon, nakabunggo ang kotse sa nagapundo nga motorsiklo sa higad sang dalan kun sa diin nagapungko si Jeljuredi alias Pao-Pao Labrador, 15 anyos, kag residente sang amo nga lugar.
Gin-arado pa sang kotse ang motorsiklo kalakip ang menor de edad antes ini nagbunggo sa gate sang isa ka balay.
Gilayon nga gindala sa ospital ang mga biktima apang napatay ang 80-anyos nga si Salmorin, kaupod sanday Abana, Granada kag Labrador.
Sa interview sang Bombo Radyo kay Police Captain Jaynick Bermudez, hepe sang Manapla Municipal Police Station, nakagwa na prisuhan si Samillano kagab-i kag nakaistoryahanay naman sila sang ginikanan ni alias Pao-Pao.
Yara naman sa estable nga kahimtangan si Estil kag Barte.
