Ginahulat pa sang Bacolod Police Station 7 ang desisyon sang pamilya sang napatay nga 23 anyos nga engineering graduate matapos ginlasak sang truck ang tricycle nga iya ginasakyan sa Circumferential Rd., Barangay Alijis, Bacolod City tinalikdan nga Disyembre 22 sang gab-i kun magapasaka sila sang kaso batok sa driver sang salakyan nga una nga nagsagaid sa tricycle.
Madumduman nga halin sa training si Relatos kag pauli na kuntani sakay sa gin-arkilahan nga tricycle sang gindalasa ini sang salakyan gani naglabog ang tricycle.
Nagasunod ang truck nga may karga nga tubo gani nalasakan sini ang tricycle kun sa diin gilayon nga ginbawian sang kabuhi si Relotos.
Sa interview sang Bombo Radyo Bacolod kay P/Lt. Conrado Espino, hepe sang Police Station 7, ginpahayag sini nga nagsungka sa Police Station 7 sadtong Disyembre 30 si Ian Roy Hullaca, 40-anyos kag residente sang Barangay Handumanan nga driver sang Toyota Innova nga nagaduag pula kag responsable sa pagbunggo sa ginasakyan nga tricycle ni Relatos.
Suno kay Espino, ginhambalansi Hullaca sang iya himata nga pulis nga magsungka nalang sa otoridad.
Nahibaluan nga gin-amat-amat na pakay-o ni Hullaca ang iya salakyan.
Sa karon ginatipon pa sang kapulisan ang mga ebidensya nga pwede magamit pananglitan magdesisyon ang pamilya Relatos nga magpasaka sang kaso.
