Pilason ang isa ka drug personality matapos matiruhan sang pulis sa Purok Langis, Brgy Banago, Bacolod City alas-7:45 kaina sang aga.
Sa interview sang Bombo Radyo Bacolod kay Police Major Rondyl Tapang, station commander sang Bacolod Police Station 3, wala sila sang drug buybust operation sa lugar, sa baylo sila ang nagresponder kuntani sa report tuhoy sa presensya sang persona nga yara sa wanted list kag nagapanago sa area.
Apang samtang nagapasulod, nadakpan nila sa akto ang grupo sang ginabanta walo ka persona nga nagapatigayon sang illegal nga transaksyon sang suspected shabu.
Matapos makita ang kapulisan, hinali ginhaboy sang suspect nga si Alyas Joe, 49 anyos, ang duha ka sachet sang suspected shabu sa kudal kaupod ang cash proceeds nga P2,050.
Samtang nakita man sang operatiba nga may ginasukbit nga armas luthang si Alyas Joe nga gina-alegar cal. 38 revolver, gani ini ang gilayon niya nga gindis-armahan apang nagbato ang suspect gani may-ara sang natabo nga pagpinukutay.
Samtang ang iban ang gintinguhaan naman nga madakop sang mga kaupod sini nga kapulisan.
Bangod may duha ka separado nga routa, duha lamang ang ila nga nadakpan nga sanday Alyas Adrian, minor kag Alyas Joshua, 34 anyos; samtang ang iban ang nakapalagyo.
Sa pihak sini, samtang nagapukutay, gintuyo ni Alyas Joe nga agawon ang service firearm sang pulis, gani napilitan sini nga tiruhon nga naigo sa nawala nga guya.
Gilayon man nga gindala sa ospital ang suspect, kag sa karun ila pa nga ginahulat ang iya medical bulletin.
Paathag ni Tapang nga sarang ma-aresto sang kapulisa ang mga persona kun sila ang nagakumiter sang krimen ukon illegal sa atubang mismo sang mga otoridad.
Ang suspect ang natumod nga yara sa Barangay Anti-Drug Abuse Council (BADAC) watchlist kag nakaagi naman priso sang 2018 bangod sa illegal grambling kag paghupot sang ginadumilian nga droga.
