Ginkanselar ni Bacolod City Mayor Alfredo “Albee” Benitez ang natalana kuntani nga dry run sang electric jeepneys sa Barangay Cabug, Bacolod City.
Sa interview sang Bombo Radyo Bacolod kay Punong Barangay Jennifer Pintucan, nagpadulong sa Barangay Cabug si Bacolod City Mayor Alfredo “Albee” Benitez sang Sabado agud maghinun-anon sa mga tricycle drivers.
Ginpamatian naman ni Benitez ang ginhingyo sang mga tricycle drivers nga ipaiway anay ang dry run, kag ini ang sa Vista Alegre nalang anay patigayunon.
Sa pihak sini, nagapanawagan naman si Pintucan sa Land Transportation Franchising and Regulatory Board (LTFRB) Region 6 nga ipahibalo sa ila kun diin ang routa sang e-jeep.
Ini bangod sila ang wala gid sang nabatun nga impormasyon may kaangtanan sa plano, gani wala man ini sang masabat sa mga pamangkot.
Bangod wala nahibaluan ang routa, indi paman matumod kun madulaan sang routa ang mga tricycle drivers.
Yara sa 200 tubtob 300 ang mga tricycle drivers sa Barangay Cabug.
Nahibaluan nga sa masami, gikan sa Punta Taytay – Central Market nga Jeep sa P20 nga plete, nagapanaog lamang ang pasahero sa Tomaro Road kag nagasakay sa tricycle pasulod sa Barangay sa P15 nga plete.
Para sa mga pumuluyo, bentaha naman kun may nagasulod nga e-jeep bangod isa nalang ka byahe kag maibanan man ang gasto sa plete.
