Gin-anunsyar ni Bacolod City Lone District Congressman Greg Gasataya nga ginahulat nalang ang response ni Department of Social Welfare and Development Secretary Rolando Bautista tuhoy sa iya hingyo nga madugangan ang mga benepisyaryo sang social pension sa ciudad.
Sa interview sang Bombo Radyo kay Gasataya, ginpahayag sini nga nagpadala ini sang sulat sa DSWD agud magpangabay kun sarang nga madugangan ang numero sang mga senior citizens nga nagabaton sang social pension.
Suno sa iya, sa karun may yara sang 2,700 ka mga benepisyaryo sa Bacolod City apang may yara pa sang 4,000 nga pending pa bangud napaidalum na sa validation apang ginahulat pa ang approval sang DSWD agud malakip sila sa mga makabaton.
Suno sa kongresista, nakit-an sini nga dako nanga butang para sa mga senior citizens nga makabaton sang benepisyo nga P500 kada bulan nagikan sa gobyerno.
Ginakabig naman nga maayo nga tikang ni Department of Social Services and Development Head Pacita Tero ang ginhimo ni Gasataya agud mapadasig ang approval sang 4,000 ka mga senior citizens nga malakip sa mga benepisyaryo.
Ginalauman man sini nga sini tuig, malakip na ang mga ini sa mga makabaton sang pension.
Gin-athag naman ni Tero nga sa validation, ginahimo prayoridad ang mga naga-edad 80 anyos pasaka, ikaduha ang mga 70-79 anyos tubtob maglab-ot sa 65 tubtob 69 anyos.
Magluwas sa validation, nagapadayon man suno sa iya ang pag-akomodar sa mga grievances kag kun may yara sang reklamo ukon pamangkot, nagpang-abiso ini nga magpadulong sa opisina sang DSSD agud iplastar ang sitwasyon.
