Nagdangat na sa P3.7 million ang balor sang assistance nga nahatag sang Department of Social Welfare and Development (DSWD) Region 6 sa mga local government units nga nabahaan sa northern Negros halin sang Enero 1.
Suno kay Rayner Jude Lobaton, focal person for Technical Assistance and Resource Augmentation sang DSWD Region 6, masobra pito ka libo ka mga pamilya nga apektado sang pagbaha sa northern Negros ang nakabaton sang family food packs tubtub Enero 17.
Sa bilog naman nga Western Visayas, 257 mil ka family food packs ang nahatag sang ahensya ukon katumbas sang P121 million.
Magluwas sa food packs, may ginhatag man nga used clothing sa mga nabahaan.
Kabug-usan nga 38, 675 ka mga pamilya ang nag-evacuate sa pito ka mga banwa kag ciudad sa northern Negros sang Enero 8 kag Enero 9.
Base sa data sang Provincial Disaster Management Program Division, 16 ka mga barangay ang apektado sa Silay City; 21 ka barangay sa Victorias City kag 20 ka mga barangay sa Talisay City.
Sa banwa sang EB Magalona, 10 ka mga barangay ang apektado; pito sa Sagay City; pito man sa Cadiz City kag isa ka barangay sa Escalante City.
May isa man ka barangay nga apektado sang baha sa Manapla apang wala sang evacuees.
Nagdeklarar naman sang state of calamity ang Talisay, Silay kag Victorias City bangud sa halit sang pagbaha.
Santo sa data, nagdangat sa 1 162 ka mga balay sa Talisay, Silay, Victorias, Cadiz kag Escalante ang nahalitan sang baha.
