Nagpagwa sang opisyal nga statement ang Department of Social Welfare and Development–Negros Island Region (DSWD–NIR) kun ngaa delayed ang sweldo, allowances, kag mga reimbursements sang ila mga empleyado.
Suno sa ahensya, nahangpan nila ang epekto sang pagka-atrasar sang sweldo ilabi na sa mga social worker, field personnel, kag mga office staff nga nagapadayon sa pagserbisyo sa publiko.
Ginapaathag sang DSWD-NIR nga ginakilala nila kag ginatratar nga may pagrespeto ang mga apektado nga empleyado.
Suno kay DSWD-NIR Director Erwin Razo, ang naatrasar nga sweldo ang bangud sa proseso sang enrollment sang rehiyon sa Electronic Modified Disbursement System (EMDS), isa sa kinahanglanon nga tikang antes pa makapagwa sang separado nga sweldo ang bag-o nga rehiyon.
Nalakip sa nasambit nga proseso amo ang kaugalingon nga banking sang rehiyon, payroll, kag financial systems bilang parte sang transition padulong sa fiscal independence.
