Napreparar na sang Department of Trade and Industry (DTI) ang nagakaigo nga bulig nga igadul-ong sa business sector nga apektado sa pagwaswas sang Bagyo Kristine.
Suno kay DTI Acting Secretary Cristina Roque nga nakahanda ang ahensiya nga suportahan ang mga micro, small, and medium enterprises (MSMEs) nga ginbaha kag ginlabayan sang bagyo.
Nagapakig-angot na ang DTI sa pribado nga sector kag mga business association agud pagihuon ang ila nga resources kag tumuron ang bulig nga igadul-ong sa mga negosyante.
Preparado naman suno diri nga makighinun-anon ang DTI sa iban nga government agencies agud nga iendorso ang nagakaigo nga programa sang mga ini sa mga apektado nga negosyante.
Gin-engganyo man ni Roque ang mga negosyante nga apektado sa pagwaswas sang bagyo nga makig-angot sa pinakamalapit nga Negosyo Center ukon DTI regional office para sa posible nga bulig.
Madumduman nga sa pagwaswas sang Bagyo Carina sa pungsod ang gin-organize sang DTI ang isa ka loan program para sa mga apektado nga MSME.
