Ginpahayag sang Negros Power nga may patigayunon nga duha ka adlaw nga power interruption humalin subong nga adlaw tubtob bwas.
Sa interview sang Bombo Radyo Bacolod kay Engr. Leomil Tambanillo Asstistant Vice President for Planning and Business Operations sang Negros Power, subong nga adlaw may power interruption alas- 6:00 sang aga tubtob alas- 6:00 sang gab-i sa bahin sang Burgos Feeder 3 sa Villa Soledad tubtob sa Charito Heights, sa brgy Granada, ciudad sang Bacolod.
Suno diri, may iconduct nga 13.2 kv line maintenance kun sa diin islan sang mas mabakod nga insulated conductor ang linya agud bisan ano nga sapat ukon kahoy man ang makatandog indi dali-dali nga magkaproblema kag madula ang kuryente.
Samtang, bwas naman may yara man sang iconduct nga line maintenance sa Bacolod-Silay 69kv.
Apektado diri ang bilog nga ciudad sang Silay kag Talisay kag ang power interruption ang maga-umpisa alas- 6:00 sang aga apang alas-7:00 sang aga sa ciudad sang Silay mabalik ang kuryente samtang alas-8:00 sang aga naman sa ciudad sang Talisay.
Pahayag ni Tambanillo, indi madali ang pagrehabilitate sang Negros Power bangod malapad ang sakop sini humalin sa ciudad sang Bacolod, Silay, Talisay, Bago kag banwa sang Murcia kag Salvador Benedicto.
Nagapangayo ini sang pag-intindi gikan sa mga konsumidores samtang padayon ang pagtrabaho sang Negros Power agud malab-ot ang ginalauman nga mapahagan-hagan ang power interruptions.
