Nakabalik na sa Pilipinas ang BRP Teresa Magbanua sang Philippine Coast Guard (PCG) sakay ang 15 ka nakasalbar kag duha ka bangkay sang Filipino seafarers gikan sa naglugdang nga M/V Devon Bay.
Ang mga ini ang ginturn-over sang Chinese Coast Guard (CCG) sa kustodiya sang PCG kahapon.
Sa pahayag sang Philippine Coast Guard, nakuha ang mga Filipino crew members matapos ang ginpatigayon nga turn-over operation sa tunga sang Philippine Coast Guard kag China Coast Guard nga may kalayuon nga 168 nautical miles sa nakatungdan nga bahin sang Tambobong, Pangasinan.
Suno sa PCG, nasaylo ang mga Pinoy paagi sa rigid-hull inflatable boats bangud sa dako nga balod gani indi makadikit ang duha ka mga barko.
Samtang nagapakig-angot naman sa Philippine Coast Guard sa pamilya sang duha ka mga napatay agud nga mahatagan sang nagakaigo nga paglubong ang mga biktima.
Sakay sa BRP Teresa Magbanua (MRRV-9701) ang 17 crew members ang nakaabot sa Pier 13 sa Manila City kaina sang aga.
Ginpasiguro naman sang PCG nga padayon ang ginapatigayon nga search and rescue operation sa apat pa nga nagapabilin nga missing.
Ulihi nga nakita ang M/V Devon cargo sa kalayuon nga 262 kilometro sa nakatungdan nga bahin sang Sabangan, Pangasinan, alas-8:30 sang gab-i sang Huwebes karga ang iron ore padulong sa Guangdong China.
Samtang, nagpalab-ot naman sang pasalamat si PCG spokesperson Captian Neomie Cayabyab sa ahensya sang CCG sa humanitarian assistance agud masiguro ang pagpabilin sang seguridad sang kabuhi sa kadagatan.
