Gin-apbrubahan sang Civil Aeronautics Board (CAB) ang pagpasaka sang surcharge rates kun sa diin posible nga maglab-ot sa dugang nga P787 ang plete sa mga domestic flight samtang posible naman nga magasaka tubtob P6,208.98 ang mga international trip.
Ini ang kasunod sa pagsaka sang produktong petrolyo bangud sa nagapadayon nga tesyon sa Middle East.
Sa isa ka abiso, ginpasaka sang aeronautics board ang passenger fuel surcharge sa Level 8 nga epektibo humalin sa Abril 1 tubtob Abril 8, nga doble kun ipaanggid sa level sang Marso.
Suno sa CAB, ini agud mapahagan-hagan ang epekto sang mga pagbag-o sang presyo sang gatong kag makontrol ang padayon nga pagsaka sini.
Santo sa Policy Resolution 25 sang CAB, ang surcharge rate ang yara sa P45 kada litro para sa one-way domestic flights.
Ini ang mahimo magsaka ang surcharge halin P253 para sa mga biyahe nga mas manubo sa 200 kilometro tubtob sa P787 para sa mga biyahe nga masobra 1,000 kilometro sa sulod sang pungsod.
Sa pihak nga bahin, mahimo magsaka sang indi magnubo sa P835.05 ang plete sa international flights pakadto sa mga malapit nga pungsod kaangay sang Taiwan kag Hong Kong.
Ang mga biyahe pakadto sa US naman ang mahimo magsaka tubtob P5,913 samtang ang mga international flight nga masobra 14,000 kilometro mahimo maglab-ot sa P6,208.
Ang Level 8 ang posible nga ipasaka pa sang CAB tubtob Level 20.
Ang amo nga pagsaka ang kasunod sa pag-aruba sang gobyerno sa pagpasaka sang plete sa kadam-an sang klase sang land transportation.
