Duha ka bloke sa Talisay City Public Market ang nahalitan sang sunog kagab-i.
Madasig man nga napalong sang mga nagresponder nga bombero ang kalayo.
Duha ka bloke ang nahalitan kun sa diin totally damaged ang balaligyaan sang plastic products, samtang partially damaged naman ang baligyaan sang bugas.
Nagapati naman ang tag-iya sang katupad sang nasunog nga bloke nga faulty electrical wire ang nagtuga sang kalayo.
Sa interview sang Bombo Radyo Bacolod kay John Rupert Dulce, bag-o lang gid ini nakahalin sang matabo ang sunog.
Pahayag sini nga nagbrownout sang sulusobra isa ka oras, kag sa pagbalik sang kuryente didto na natabo ang sunog.
Suno diri, gamay lang ang nalab-ot sa iya nga bloke, apang ini nabasa matapos ginbombahan sang tubig sang mga bombero agud indi malatayan sang kalayo.
Gipasalig naman sang Market Supervisor ang bulig sang Talisay City Government sa nasunugan.
Sa interview sang Bombo Radyo Bacolod kay John Tirthdas, gilayon nga nagcontact si Talisay City Mayor Atty Rowena “Wing” Lizares nga buligan ang mga biktima.
Pahayag sini nga isa ang totally damaged nga bloke kag may isa nga partially damaged.
Luwas sa duha ka bloke nga nasunog, may iban naman nga bloke nga nagkalabasa ang baligya.
Kun indi gilayon makay-o ang bloke, ginpasalig ni Tirthdas nga pangitaan anay ang mga biktima sang masayluhan nga bloke agud makapadayun sa pagbaligya.
Ginatsekyar naman nila sa karun ang electrical wirings sa bilog nga merkado.
Gina-asses paman sa karun kun pila ang ihatag nga bulig sa mga nahalitan nga vendors.
