Ginhatagan sang Alternative delivery mode of learning ang duha ka estudyante nga gina-alegar nangtripping sa isa ka Grade 9 student sa isa ka eskwelahan sa Barangay Banago, Bacolod City sang Sabado.
Sa interview kay Bacolod City Secretary to the Mayor Atty. Marty Go, temporaryo nga wala anay ginpatuon sa eskwelahan ang duha ka estudyante kag ginhatagan lamang sang tulun-an sa ila balay samtang wala pa nabaton sang Department of Education-Division of Bacolod City sa pagpanguna ni Division Schools Superitendent Dr. Dennis Develos ang confirmatory test sa crystalline substance nga nakuha sang gwardiya sa bag sang 17 anyos.
Suno kay Go, santo sa nakuha nga impormasyon ni Dr Develos ang gina-alegar tripping sa isa ka estudyante ang isa man ka pagtimalos sa biktima bangud may daan nga indi pag-intsindihanay.
May yara man sang ginpatigayon nga psychosocial intervention sa mga nasambit nga estudyante.
Samtang sa ulihi nga impormasyon nga nabaton sang Bombo News Team nakumpirmar sa laboratory test nga indi shabu ang nakuha sa 17 anyos nga Grade 9 student sa eskwelahan sa Brgy. Banago, Bacolod City sang Hulyo 20.
Sa interview kay Police Captain Ma. Liberty Indiape, spokesperson sang Bacolod City Police Office, sa resulta sang ginpatigayon nga laboratory test sang Regional Forensic Unit sang Police Regional Office – Negros Island Region, naggwa nga indi illegal drugs ang duha ka putos sang crystallized substance nga una ginpatihan nga shabu.
Apang bangod test para makumpirmar kun illegal drugs lamang ang ila ginrequest, wala pa nila mahibaluan kun ano ang substance nga nakuha sang school guard gikan sa bag sang estudyante.
