Padayon nga nagapabulong ang duha ka mga biktima nga ginsungay sang karbaw sa Purok Totong 3, Brgy. Felisa, ciudad sang Bacolod, sang Setyembre 3, sang aga.
Ginkilala ang mga biktima nga sanday Belinda Villanueva, 55 anyos, balo kag Christian Bolanon, 26 anyos Soltero lunsay residente sang nasambit nga lugar.
Sa interview sang Bombo Radyo Bacolod kay Police Captain Lelanie Lagoting, station commander sang Bacolod Police Station 10, sang Martes sang aga, nagkuha sang tangkong sa bakante nga lote nga ginalawigan sang mga karbaw kag iban nga sapat.
Suno kay Lagoting samtang nagapangkuha sang tangkong si Belinda ginpalapitan ini sang karbaw kag hinali ginsungay.
Nakaagom ini sang samad sa agtang, sa kilid kag sa iban nga bahin sang lawas.
Gindala sang rescue sang Barangay Felisa sa hospital si Villanueva apang sang nakabalik na ang ambulansya ginsungay naman sang karbaw si Bolanon matapos nga may ginkuha.
Ang karbaw ang ginapanag-iyahan ni Elizalde Libo-on nga residente man sang nasambit nga lugar.
Bangud sa insidente ang tag-iya sang sapat ang nagdesisyon nga ihawon nalang ini.
Ang duha nga nasamaran matapos nga sungayon sang karabaw ang pagabuligan naman ni Libo-on sa mga galastuhan sa pagpabulong.
