Duha ka pickup nga salakyan, duha ka motorsiklo kag isa ka tricycle ang gin-arado sang isa ka van sa National Highway sang Barangay Poblacion, Valladolid, Negros Occidental alas-9:15 kaina sang aga.
Sa interview sang Bombo Radyo Bacolod kay Police Captain Bonifacio Galvez Jr., deputy chief of police sang Valladolid Municipal Police Station, ang high ace van ang nagikan sa sur padulong sa norte nga dereksyon kun sa diin pito ang sakay nga ginalakipan sang driver, asawa sini kag mga kabataan nga may sugaton kuntani sa airport.
Sa imbestigasyon, ginpahayag sang mga nakawitness nga madasig ang dalagan sang van kag gulpyada lamang ang pagbunggo sini sa duha ka nakapark nga motorsiklo kag tricycle tubtob nga nabunggo sa likod sang nakaparada nga gray nga Toyota Hilux nga Pick-up.
Bangod sa impact, naglupok ang airbag sang van, samtang ang gray nga pickup ang nagasarurot naman tabok sa pihak nga dalan kun sa diin nabungguan man sini ang nakaparada nga puti nga pickup
Suno kay Galvez, ang driver, asawa sini kag tatlo ka kabataan sa likod ang nag-angkon sang samad kag gindala sa Bago City Hospital.
Ang mga ini ang luwas naman sa katalagman.
Ginpangayo na lamang ang contact number sang mga salakyan nga naulamid sa insidente agud nga sila ang makadiskusyon sa tion nga makagwa na sa ospital ang driver sang van.
Panawagan na lamang ni Galvez sa mga motorista sa karun nga maulanon ang panahon, nga maghalong sa dalanon.
